Handelslekasje

Aller fyrst. Snø i dag og? Eg meiner eg les i går at det var meldt snø i høgden… No har me vel og merke flytta til oppsida av vegen her på Nes, men er vel litt drøyt å kalle det i høgden?

Kilder frå Sogndalsområdet melder at der har det snøa litt i natt, men i 7-tida i dag bulle-regna det heilt til Årøy-tunnelen. So det kjem vel sigande inn fjorden utover dagen. Blaute snø no og – knakande god kramsnø faktisk – men det blir ikkje snømann. I dag heller =)

I følgje ein blogg fremst i Jostedalen set folk posten og postmennene/damene høgt på lista. Og ditta med posten er gode greier. I dag fekk eg levert fleire hundre kilo på døra før klokka 9, bore inn i huset der eg ville ha det. Det var igjen Ikea som får nyte godt av mine aggresjonsutbrot i nærleiken av internett, og påfølgjande trass-handling. Frakten kostar jo flesk. Men etter prissamanlikning med indre sogn sine 2-3 møbelbutikkar kjem eg likevel mellom 5 og 6000 i pluss etter frakt. Ein skulle ikkje tru slikt var mogleg.

(Og endå les eg då i Sogn Avis for ikkje lenge sia at møbelsalet i indre Sogn knuste alle rekordar! Kven er det som har so mykje pengar?)

Ja – eg skulle vel støtta lokale kjeder, men sanneleg min hatt om eg betalar dobbel pris av den grunn. Då støttar eg heller posten!

Eg føler ikkje for å verken bøyge meg eller løfte so mange kilo – noko som kan gjere monteringa komplisert. So då var det berre å setje seg godt til rette og vente på at mannen i huset skal komme heim – eg sete klar med skrutrekkar og fotoapparat. Berre 7-8 timar til å vente no…

Related Post

6 Comments